බලය ඇති පුද්ගලයාට හා බලය නැති පුද්ගලයාට නීතිය වෙනස් ආකාරයකට ක්‍රියාත්මක වන රටක සංස්කෘතික උරුමයන් හා පුරාවස්තු ආරක්ෂා කළ නොහැකි බව ගම්පහ දිස්ත්‍රික් ස්වාධීන කණ්ඩායම් අපේක්ෂක වෛද්‍ය පැතුම් කර්නර් පැවසුවේය.
අපේ උරුමයන් අනාගත පරපුර වෙනුවෙන් ආරක්ෂා කර දීමට පාලක පන්තිය හා දේශපාලන සංස්කෘතිය වෙනස් කළ යුතු බවත් ප්‍රකාශ කළේය. පසුගියදා කැලණිය ප්‍රදේශයේ පැවැති ජන හමුවකට සහභාගී වෙමින් මේ බව සඳහන් කළ ඒ මහතා වැඩිදුරටත් අදහස් දක්වමින් මෙසේද කීවේය.
“කුරුණෑගල කඩලා දාපු රජ මාලිගාව ගැන සමාජයේ ලොකු ආන්දෝලනයක් ඇති වෙලා තියෙන්නේ වෙන කිසිවක් නිසා නොවෙයි ඡන්දයක් අත ළඟ තිබෙන නිසායි. මේ පුරාවස්තු කඩා දාපු අය වගේම, පුරාවස්තු කඩා දැමීම ගැන කතා කරන අයත් ඡන්දය ගැන බලාගෙන කටයුතු කරනවා මිසක් පුරාවස්තු, අපේ උරුමයන් ආරක්ෂා කරන්න ඕනෑ කියා සැබෑ උවමනාවෙන් කටයුතු කරන අය නොවෙයි.
“දැන් මේ වෙලාවේ ඡන්දයක් නැතිනම් අපේ උරුමයන් විනාශ කරලා තියෙනවාද නැද්ද යන්න ගැන කවුරුවත් කතා කරන්නේ නෑ. ඒක සමහර විට මාධ්‍යයේත් පුංචි ප්‍රවෘත්තියකට සීමා වෙන්න තිබුණු දෙයක්. මේ ඡන්ද වෙලාවේ දේශපාලනික වශයෙන් ජනතාව මේ ගැන සංවේදී කරන්න පුලුවන් නිසා තමයි මේ ගැන අවධානය යොමු කරන්නේ. දැන් නැඟෙනහිර පළාත දිහා බලන්න. නැඟෙනහිර පළාතේ අපේ උරුමයන් තවම සැඟවිලා තිබෙනවා. ඒවා විනාශ වෙන්න ඇරලා බලාගෙන ඉන්නවා. ඒවා ආරක්ෂා කරන්න කටයුතු කරන බවක් අපට පේන්න නෑ. කුරූණෑගල රාජ සභා ගොඩනැඟිල්ල කඩා දැමීම තරම් උනන්දුවක්, අවධානයක් අවුරුදු ගාණක් තිස්සේ නැඟෙනහිර පළාතේ නටඹුන් විනාශය ගැන යොමු වුණේ නෑ. දේශපාලනඥයෝ විතරක් නෙමෙයි මාධ්‍යයත් ඒවා සිදු නොවුණු ගානට බලාගෙන ඉන්නවා.
“දශක ගණනාවක් තිස්සේ පැවැති තට්ටුමාරු දේශපාලනයට උවමනා ආකාරයට අපේ උරුමයන් විනාශ වෙන්න ඉඩ හැරියේ ඒ හරහා තමන්ගේ දේශපාලන උවමනාවන් ඉටු කර ගැනීමට මේ හරහා මුදල් ලබා ගැනීමේ මාර්ග විවෘත කරගෙන තිබුණු නිසායි. එක ආණ්ඩුවක් අපේ පුරාවස්තු, ඓතිහාසික උරුමයන් විනාශ වීමට ඉඩ දී බලාගෙන සිටින විට අනෙක් ආණ්ඩුව සැලසුම් කරලා මේවා විනාශ කළා. මේ ආකාරයට පුරාවස්තු විනාශ කරන අය සම්බන්ධයෙන් කටයුතු කිරීමට තරම් අපේ රටේ නීතිය තද නෑ. අපේ රටේ නීතිය ඒ තරම් දුර්වල වෙලා තියෙන්නේ. නීතිය වල් වැදිලා තියෙනවා. පාලකයාට එක නීතියකුත්, සාමාන්‍ය ජනතාවට තවත් නීතියකුත් ක්‍රියාත්මක වෙන නිසා තමයි මේ ආකාරයට දේශපාලන බලය තිබෙන අයට අවශ්‍ය ආකාරයට පුරාවස්තු විනාශ කිරීමට හැකියාව ලැබී තිබෙන්නේ.
“නීතිය අසමාන වූ රටක අපේ උරුමයන් ආරක්ෂා කර ගැනීමට නොහැකියි. මේ නිසා අනාගතයේදී පාලක පංතිය වෙනස් කරන්න පුළුවන් නම්, දේශපාලන සංස්කෘතිය වෙනස් කරන්න පුළුවන් නම් අනාගත පරපුර වෙනුවෙන් අපේ උරුමයන් ආරක්ෂා කර දිය හැකියි. ඒ වෙනුවෙන් අපි දේශපාලන, සමාජ නායකත්වය ලබා දෙනවා.”
