ගෝඨාභය රාජපක්ෂ මහතා මේ රටේ ජනාධිපති කළේ වෙනස් රටක්, අලුත් රටක් බලාපොරොත්තුවෙන්. ඒත් ජනාධිපතිවරයාට පමණක් මෙය කළ නොහැකියි. යනුවෙන් හිටපු ඇමැති, ශ්‍රී ලංකා නිදහස් පක්ෂ ජාතික සංවිධායක දුමින්ද දිසානායක මහතා පැවැසීය.
ඒ මහතා මේ බව ප්‍රකාශ කළේ එප්පාවල, ඉහළවැව ප්‍රදේශයේ පැවති ජන හමුවකදීය.
එහිදී වැඩිදුරටත් අදහස් දැක්වූ ඒ මහතා මෙසේ ද කීය.
වෙනදා අප කතා කරන්නේ අපට ආණ්ඩුවක් හදලා දෙන්න කියලා. හැබැයි මේ පාර වෙනස්. අප 2/3ක බලයක් ඉල්ලනවා. ඒ බලය ඉල්ල‍න්නේ අපට ශක්තිමත් ආණ්ඩුවක් හදා මේ රට වෙනස් කරන්න. රට අලුත් කරන්න අපට අවශ්‍යයි. ඒ අවශ්‍යතාව ඇති වෙන්නේ අද නෙවෙයි. අප ගෝඨාභය මහතා මේ රටේ ජනාධිපති කළේ වෙනස් රටක්, අලුත් රටක් බලාපොරොත්තුවෙන්. දැන් තිබෙන්නේ 2/3ක බලයක් එක්ක පාර්ලිමේන්තුව හදා ඉතිරි වැඩ ටික කරන්න ජනපතිට ශක්තියක් දෙන වෙලාවක්. එහෙම නම් මේ වෙලාවේ අප හැමෝම එකතු වෙන්න ඕනැ.
එසේ නම් අගෝස්තු 05 වැනිදා මේ රට ගොඩනඟන්න ඒ වෙනුවෙන් අප අනුරාධපුරයෙන් අපේ යුතුකම ඉෂ්ට කරමු. ඒ වෙනුවෙන් පොහොට්ටුවට කතිරය ගසා නියත වශයෙන්ම අනුරාධපුර දිස්ත්‍රික්කයෙන් පාර්ලිමේන්තු මන්ත්‍රීවරුන් 07 දෙනෙක් පාර්ලිමේන්තු යවන්න ඔබතුමන්ලා සූදානම් වෙන්න. ඒ වෙනුවෙන් ඔබතුමන්ලා මහන්සි වෙන්න.ඒ වෙනුවෙන් ඔබතුමන්ලා ඇප කැප වෙන්න ඕනැ. ඒ වෙනුවෙන් ඔබතුමන්ලා හැමෝම එකා වගේ අත්වැල් බැඳගෙන වැඩ කරන්න.
