පාර්ලිමේන්තු මහ මැතිවරණයේ ඡන්ද ගණන් කිරීමේ මධ්‍යස්ථාන සංඛ්‍යාව පෙර වසරවලට සාපේක්ෂව දෙගුණ කර ඇතැයිද ඒ අනුව මෙවර මධ්‍යස්ථාන සංඛ්‍යාව 2,820 ක් දක්වා වැඩිකර ඇතැයි මැතිවරණ කොමසාරිස් ජනරාල් සමන් රත්නායක පැවසීය. එය පෙර මහ මැතිවරණයේදී 1420ක් වූ බව පෙන්වා දුන් රත්නායක මහතා සෞඛ්‍යාරක්ෂිතව කඩිනමින් ප්‍රතිඵල ලබා දීම උදෙසා මෙසේ මධ්‍යස්ථාන සංඛ්‍යාව වැඩි කළ බව පෙන්වා දුන්නේය.
ඡන්ද ගණන් කිරීමේ ප්‍රධාන පරිශ්‍ර සංඛ්‍යාව 71 ක් බවත් ඒ පරිශ්‍රයන්හි සමස්ත ගණන් කිරීමේ මධ්‍යස්ථාන (ගණන් කිරීමේ ශාලා) 2820ක් බවත් එක් ගණන් කිරීමේ මධ්‍යස්ථානයකට ඡන්ද 5000 – 6000ක් ප්‍රමාණයක් ලැබෙන පරිදි ක්‍රමවේදයක් සකස් කර ඇති බවද ඔහු කීවේය.
ඒ යටතේ තැපැල් ඡන්ද ගණන් කිරීම සඳහා මධ්‍යස්ථාන 453ක් හා සාමාන්‍ය ඡන්ද ගණන් කිරීමේ ස්ථාන 2367ක් ස්ථාපිත කරන බවද රත්නායක මහතා කීය.
මෙවර මහ මැතිවරණයට ලියාපදිංචි ඡන්ද දායකයන් 1,62,63,885ක් සිටින අතර ඔවුහු ඡන්ද මධ්‍යස්ථාන 12,774කදී ඡන්දය ලබා දීමට කටයුතු කරති.
පිළිගත් දේශපාලන පක්ෂවලින් නාමයෝජනා 3652ක් හා ස්වාධීන කණ්ඩායම්වලින් නාමයෝජනා 3800ක් මෙවර මැතිවරණයට ලැබී ඇතැයිද ඒ මහතා පෙන්වා දෙයි.
