තෙල් ඇමති අමරවීරගේ වාහනයට ජලය මිශ්‍ර පෙට්‍රල් ගහලා

මගී ප්‍රවාහන කළමනාකරණ, විදුලිබල හා බලශක්ති මෙන්ම ඛනිජ තෙල් විෂය භාර ඇමැතිවරයා වන මහින්ද අමරවීර ගමන් ගත් වාහනයට දක්ෂිණ අධිවේගී මාර්ගයේ පිරවුම්හලකින් ජලය මිශ්‍ර ඉන්ධන පිරවීම සම්බන්ධයෙන් පරීක්ෂණයක් ආරම්භ කර ඇත.

ඇමැතිවරයා පසුගිය බ්‍රහස්පතින්දා කොළඹ සිට අඟුණුකොළපැලැස්ස බලා දක්ෂිණ අධිවේගී මාර්ගයේ ගමන් කරන අතරේ වැලිපැන්න සේවා මධ්‍යස්ථානයේදී සිය රථයට ඉන්ධන පුරවාගෙන ඇත.

ඉන්ධන ටැංකිය සම්පූර්ණයෙන්ම පිරෙන සේ ඉන්ධන ලබාගත් ඇමැතිවරයා යළි ගමන් අරඹා කිලෝමීටර් 10ක් පමණ ඉදිරියට ගිය පසු වාහනය එකවරම නතර වී තිබේ. පරීක්ෂා කරද්දී ඉන්ධන ටැංකියේ ජලය ලීටර 4ක් පමණ තිබී ඇත.

මේ පිළිබඳව අදාළ ඉන්ධනහලෙන් විමසීම් කර ඇති අතර, තමන් අලෙවි කළ ඉන්ධනවල ජලය මිශ්‍ර වී නැතැයි ඔවුන් පවසා ඇත. කෙසේ වෙතත් සිද්ධිය සම්බන්ධයෙන් වහා පරීක්ෂණයක් පවත්වන ලෙස ඇමැතිවරයා ඛනිජ තෙල් සංස්ථාවට නියෝග කළ බව අමාත්‍යාංශයේ ප්‍රකාශකයෙක් පැවසීය.

Recommended For You

About the Author: Editor