කොවිඩ්-19 වසංගත තත්ත්වය හේතුවෙන් සංචරණ සීමා පැනවූ රාජාංගණය ප්‍රදේශයේ තැපැල් ඡන්ද විමසීම 29 දා පැවැත්වෙන බව මැතිවරණ කොමිෂන් සභාව පවසයි.
දිස්ත්‍රික් තේරීම්භාර නිලධාරීන්, නියෝජ්‍ය සහ සහකාර මැතිවරණ කොමසාරිස්වරුන් ඇතුළු නිලධාරීන් සමඟ මැතිවරණ කොමිසම ඊයේ (26) සාකච්ඡාවක නිරත වූ අතර, එම සාකච්ඡාවේදී මැතිවරණ කොමිෂන් සභාවේ සභාපතිවරයා මේ බව අනාවරණය කර තිබේ.
එහිදී නිරෝධායනයට ලක්වන පුද්ගලයන්ට ඡන්දය භාවිත කිරීමට අවස්ථාව ලබාදීම සම්බන්ධයෙන්ද සාකච්ඡා කර ඇත.
නිරෝධායන මධ්‍යස්ථානවල සහ නිරෝධායනයට ලක්කර ඇති නිවෙස්වල ඡන්ද දායකයන්ට ලබන 31 වැනිදා ඡන්දය ලබාදීමට අවස්ථාව සලසාදීම පිළිබඳව අද (27) අවසන් තීරණයක් ගන්නා බවද මැතිවරණ කොමිසමේ සභාපතිවරයා මෙහිදි පවසා තිබේ.
මේ අතර අගෝස්තු 5 වැනිදා පැවැත්වෙන ඡන්දයේ පළමු ප්‍රතිඵලය අගෝස්තු 6 වැනිදා පස්වරුව වන විට නිකුත් කිරීමට බලාපොරොත්තු වන බවද මැතිවරණ සභාපතිවරයා මෙහිදී පවසා ඇත.
මැතිවරණය පැවැත්වීම, ඡන්ද ගණන් කිරීම, ආරක්ෂක විධි විධාන ආදි කරුණු රැසක් සම්බන්ධයෙන් මේ සාකච්ඡාවේදී අවධානය යොමු කෙරිණි.
