ඉදිරි පාර්ලිමේන්තු මැතිවරණයේදී තමන්ට ලැබෙන සෑම මනාපයක් වෙනුවෙන්ම පැළයක් සිටුවන බව හිටපු පාර්ලමේන්තු මන්ත්‍රී නීතිඥ උදය ගම්මන්පිල මහතා පැවැසීය.
ඒ මහතා මේ බව පැවැසුවේ ඊයේ ( 27) පරිසරවේදීන් ඉදිරියේ පොරොන්දුවක් ලබා දෙමිනි. මෙය ශ්‍රී ජයවර්ධනපුර කෝට්ටේ දියසරු උයනේදී පැවැත්විණි.
එහිදී වැඩිදුරටත් අදහස් දැක්වූ ඒ මහතා මෙසේ ද කීය.
මැතිවරණ තමයි පරිසරයේ මාරයා බවට පත් වෙලා තිබෙන්නේ. පරිසර ඇමැතිවරුන්, පරිසර අධිකාරිවල හිටපු සභාපතිවරුන් මැතිවරණයට ආ විට පරිසරය අමතක වෙනවා. කාලයක් පොලිතින් ටොන් ගණනින්, පෝස්ටර් කෝටි ගණනින් පරිසරයට එකතු වුණා. අප දන්නවා පෝස්ටර් එකක ආයු කාලය පැය කිහිපයයි. නැතිනම් දින කිහිපයයි. වැසි කාලයට මේ පෝස්ටරේ තිබෙන විස රසායන පරිසරයට එකතු වෙනවා. පෝස්ටර් සෑදීමට ලක්ෂ ගණනින් ගස් කැපෙනවා. රතිඤ්ඤා හරහා ශබ්ද දූෂණයක් විතරක් නොව එහි අඩංගු විස ද්‍රව්‍යයත් පරිසරයට එකතු වෙනවා. මේ සියල්ල ම නිසා මැතිවරණ කාලයේ පරිසරය දුෂණය වී දැවැන්ත විනාශයක් සිදු වෙනවා
