මෙවර මහ මැතිවරණය සඳහා පොලිස් නිලධාරීන්, පොලිස් විශේෂ කාර්ය බළකා නිලධාරීන් සහ සිවිල් ආරක්ෂක බළකායේ නිලධාරීන් 75000කට ආසන්න ප්‍රමාණයක් යෙදවීමට කටයුතු කරන බව මැතිවරණ කටයුතු භාර ජ්‍යෙෂ්ඨ නියෝජ්‍ය පොලිස්පති ප්‍රියන්ත වීරසූරිය මහතා පවසයි.
මැතිවරණ රාජකාරි කටයුතු කිරිම සඳහා මැතිවරණ කොමිසම විසින් පොලිසියට රුපියල් බිලියනයකට ආසාන්න ප්‍රමාණයක් ලබාදී ඇති බවද ඒ මහතා කියා සිටියේය.
ඒ මහතා මේ බව කියා සිටියේ ඊයේ (29) පොලිස් මූලස්ථානයේ පැවැති විශේෂ මාධ්‍ය සාකච්ඡාවේදීය.
මැතිවරණ කටයුතු භාර ජ්‍යෙෂ්ඨ නියෝජ්‍ය පොලිස්පති ප්‍රියන්ත වීරසූරිය මහතා තවදුරටත් කියා සිටියේ මේ වන විට මැතිවරණය සම්බන්ධයෙන් පුද්ගලයන් අත්අඩංගුවට ගැනීම් 317ක් වාර්තාවී ඇති අතර එයින් අපේක්ෂකයන් 06 දෙනකු අත්අඩංගුවට ගෙන ඇති අතර, මැතිවරණ ප්‍රචණ්ඩ ක්‍රියා පැමිණිලි 289ක් වාර්තාවන අතර එයින් 80ක් දරුණු අපරාධ නොවන පැමිණිලි බවයි . පසුගිය ජනාධිපතිවරණයට සාපේක්ෂව ප්‍රචණ්ඩ ක්‍රිය වැඩිවීමක් වාර්තාවුවද 2015 මැතිවරණයට සාපේක්ෂව සමස්ථයක් ලෙස සියයට 35.25ක අඩු අගයක් ගන්නා වන බවත් එවැනි අගයකට හේතුවක් වි ඇත්තේ මැතිවරණය සම්බන්ධයෙන් ප්‍රචාරණ කටයුතු වලට ශ්‍රී ලංකා පොලිසිය මැතිවරණය ප්‍රකාශයට පත් කළ දින සිට මැතිවරණ නීතිය බලාත්මක කිරීම බවද කියා සිටියේය.
